مسلسل خراب پرفارمنس کے بعد صائم ایوب کا کرکٹ سے دور رہنے کا فیصلہ

لاہور(حال نیوز )صائم ایوب کا کرکٹ سے دل اچاٹ ہونے لگا، انہوں نے خود پی سی بی سے درخواست کی ہے کہ وہ کچھ عرصے کھیل سے دور رہنا چاہتے ہیں۔ ذرائع کے مطابق بیٹر ذہنی طور پر مضبوط ہو کر ہی کھیل میں واپس آئیں گے۔صائم ایوب ان دنوں کیریئر کے بدترین دور سے گزر رہے ہیں، ناقص کارکردگی کے سبب انہیں قومی اسکواڈ سے بھی باہر کیا جا چکا، صائم نے ڈومیسٹک میچز کھیلنے سے گریز کیا، سینٹرل کنٹریکٹ کی فہرست میں بھی ان کا نام شامل نہیں ہے۔

ذرائع نے بتایا کہ صائم نے پی سی بی سے خود کہا ہے کہ وہ فی الحال نہیں کھیل سکتے اور ون ڈے ڈپارٹمنٹل کرکٹ ٹورنامنٹ سے کرکٹ میں واپسی کا ارادہ ہے، وہ ذہنی طور پر مزید مضبوط ہونا چاہتے ہیں۔ یاد رہے کہ ٹی ٹونٹی کیریبیئن لیگ میں سنچری کی بنیاد پر صائم ایوب کو انگلینڈ کیخلاف ٹیسٹ کھیلنے کیلیے طلب کیا گیا تھا مگر وہ دونوں اننگز میں صفر پر آؤٹ ہوئے جس سے اعتماد کم ہو گیا۔مزید ناکامیوں کے بعد ون ڈے ٹرائنگولر سیریز کی ٹیم سے بھی انہیں باہر کر دیا گیا تھا، اس وقت کہا گیا کہ وہ ڈومیسٹک میچز کھیل کر فارم بحال کریں گے لیکن صائم ایوب نے ایسا نہیں کیا۔

صائم نے گزشتہ برس سری لنکا کیخلاف سیریز سے اب تک آخری 5ون ڈے میچز میں 60رنز بنائے ہیں، رواں سال ٹی ٹونٹی ورلڈ کپ سے وہ کوئی نصف سنچری نہیں بنا سکے، اس دوران ان کا اسکور24،19،6،14،7،21،29،8رہا۔ پاکستان کیلیے ہر طرز کے آخری 15میچز کی 16اننگز میں صائم ایوب نے 11.75کی اوسط سے 188رنز بنائے ہیں، اس دوران 33ان کا سب سے زیادہ اسکور رہا۔ مسلسل ناکامیوں کے باوجود ٹیم مینجمنٹ انہیں متواتر مواقع دیتی رہی تاہم اب وہ خود وقفہ لے کر اپنے مسائل حل کرنا چاہتے ہیں۔

شاید آپ یہ بھی پسند کریں
جواب چھوڑیں

آپ کا ای میل ایڈریس شائع نہیں کیا جائے گا.