سیلاب کی تباہ کاریاں جاری، ہلاکتیں 1100 سے تجاوز کر گئیں

حال نیوز۔۔۔۔۔۔ایشیائی ممالک میں سیلاب کی تباہ کاریاں جاری، ہلاکتیں 1100 سے تجاوز کر گئیں، انڈونیشیا 604، سری لنکا 366، تھائی لینڈ 176، ملائیشیا میں 3افراد ہلاک ہوئے۔ ایشیائی ممالک میں سمندری طوفانوں، بارشوں، سیلاب اور لینڈ سلائیڈنگ نے تباہی مچادی۔ایشیا ممالک میں حالیہ قدرتی آفات سے لاکھوں لوگ متاثرہوگئے، ایک ہفتے کے دوران گیارہ سو سے زیادہ افراد جان کی بازی ہار گئے جبکہ ہزاروں بے گھر ہو گئے۔انڈونیشیا میں 604، سری لنکا میں 366، تھائی لینڈ میں 176اور ملائیشیا میں 3افراد ہلاک ہوئے۔

سری لنکا میں ایمرجنسی نافذ کر دی گئی، صدر انورا کمارا نے سمندری طوفان، بارشوں اور سیلاب سے بڑے پیمانے پر ہوئی تباہ کاریوں کو 2004کے سونامی کے نقصانات سے زیادہ تباہ کن قرار دے دیا۔عالمی فلاحی تنظیم سیو دی چلڈرن کے مطابق انڈونیشیا اور تھائی لینڈ میں شدید سیلاب اور لینڈ سلائیڈنگ کے باعث ہزاروں بچے اسکول نہیں جا پا رہے۔تنظیم کی تازہ رپورٹ کے مطابق جنوبی تھائی لینڈ میں تقریبا 76ہزار بچے تعلیمی سرگرمیوں سے محروم ہیں کیونکہ اسکول یا تو بند ہیں یا متاثرہ علاقوں میں رسائی ممکن نہیں۔

انڈونیشیا میں بھی صورتحال سنگین ہے جہاں ایک ہزار اسکول سیلاب سے تباہ یا بند ہوچکے ہیں۔ متعدد اسکولوں کو عارضی طور پر ایمرجنسی شیلٹرز کے طور پر بھی استعمال کیا جارہا ہے جس کے باعث تدریسی سرگرمیاں معطل ہیں۔متاثرہ بچوں کو تعلیم کے ساتھ ساتھ نفسیاتی اور حفاظتی امداد کی فوری ضرورت ہے جبکہ جاری بارشوں کے باعث صورتحال مزید خراب ہونے کا خدشہ ہے۔دوسری جانب سمندری طوفان دتوا کے زیراثر بھارتی ریاست تامل ناڈو میں بھی شدید بارشوں کا سلسلہ جاری ہے، چنائی میں فلائٹ آپریشن معطل کردی گئی۔