بلوچستان کے نوجوانوں کو عالمی معیار کے تربیتی پروگرام کرانیکا فیصلہ
حال نیوز۔۔۔۔۔۔۔بلوچستان کے نوجوانوں کو عالمی معیار کے تربیتی پروگرام کرانیکا فیصلہ، وزیر اعلی بلوچستان کی زیر صدارت اجلاس، نوجوان انجینئرز کے لیے عالمی معیار کی تربیتی پروگرام کا جائزہ لیا گیا، صوبے کے نوجوان انجینئرز کو پیشہ ورانہ مہارت اور عملی تجربے کے مواقع فراہم کرنا حکومت کی ترجیح ہے۔ وزیر اعلی بلوچستان میر سرفراز بگٹی کی زیر صدارت چیف منسٹر سیکرٹریٹ کوئٹہ میں ایک اہم اجلاس منعقد ہوا جس میں صوبے کے نوجوان انجینئرز کے لیے عالمی معیار کی منظم اور پیشہ ورانہ تربیت فراہم کرنے سے متعلق منصوبے کا تفصیلی جائزہ لیا گیا اجلاس میں چیئرمین پاکستان انجینئرنگ کونسل انجینئر وسیم نذیر نے وزیر اعلی بلوچستان کو ٹیکنیکل ہیومن ڈویلپمنٹ پروگرام کے مختلف پہلوں پر بریفنگ دی۔
چیف منسٹر سیکرٹریٹ میں حکومت بلوچستان اور پاکستان انجینئرنگ کونسل کے مابین باہمی شراکت داری کے معاہدے پر دستخط کی سادہ مگر پروقار تقریب بھی منعقد ہوئی اس موقع پر ایم او یو پر صوبائی حکومت کی جانب سے ایڈیشنل چیف سیکرٹری ترقیات و منصوبہ بندی زاہد سلیم جبکہ پاکستان انجینئرنگ کونسل کی جانب سے چیئرمین انجینئر وسیم نذیر نے دستخط کئے قبل ازیں بریفنگ میں وزیر اعلی بلوچستان کو آگاہ کیا گیا کہ ٹیکنیکل ہیومن ڈویلپمنٹ پروگرام کے تحت بلوچستان کے فارغ التحصیل نوجوان انجینئرز کو چھ ماہ کی جامع عملی اور عالمی معیار سے ہم آہنگ تربیت فراہم کی جائے گی جبکہ ٹرینیز کو ماہانہ پچاس ہزار روپے مشاہرہ بھی دیا جائے گا اجلاس کو بتایا گیا کہ تین سو نوجوان انجینئرز کے پہلے بیچ کی تربیت یکم جنوری 2026سے باضابطہ طور پر شروع ہوگی۔
وزیر اعلی بلوچستان میر سرفراز بگٹی کا کہنا تھا کہ صوبے کو جدید مہارتوں اور پیشہ ورانہ تقاضوں سے آراستہ انجینئرز کی اشد ضرورت ہے جو بلوچستان کے ترقیاتی ڈھانچے کو مضبوط بنانے میں کلیدی کردار ادا کر سکیں ان کا کہنا تھا کہ نوجوان انجینئرز کو سرکاری شعبے میں عملی تجربے اور صلاحیتوں کے اظہار کے بہترین مواقع فراہم کرنا حکومت کی ترجیح ہے وزیر اعلی کا کہنا تھا کہ حکومت بلوچستان نوجوان انجینئرز کی پیشہ ورانہ استعداد بڑھانے اور انہیں ادارہ جاتی معاونت فراہم کرنے کے لیے ہر ممکن قدم اٹھا رہی ہے
وزیر اعلی بلوچستان میر سرفراز بگٹی نے اس عزم کا اظہار کیا کہ نوجوانوں کو میرٹ اور شفافیت کی بنیاد پر تربیتی مواقع فراہم کیے جائیں گے تاکہ وہ صوبے کے ترقیاتی عمل میں فعال اور مثر کردار ادا کر سکیں وزیر اعلی میر سرفراز بگٹی کا کہنا تھا کہ صوبائی حکومت انجینئرنگ کے شعبے کو بین الاقوامی معیار سے ہم آہنگ کرنے اور انسانی وسائل کی ترقی کے لیے مربوط اقدامات کر رہی ہے۔ انہوں نے اس امید کا اظہار کیا کہ پاکستان انجینئرنگ کونسل اور حکومت بلوچستان کا مشترکہ پروگرام صوبے میں ٹیکنیکل ہیومن ریسورس ڈیولپمنٹ کے لیے سنگِ میل ثابت ہوگا۔
