آن لائن جنسی جرائم، ساؤتھ کوریا کا سب سے بڑا گروہ پکڑا گیا

حال نیوز۔۔۔۔۔۔۔آن لائن جنسی جرائم، ساؤتھ کوریا کا سب سے بڑا گروہ پکڑا گیا، 33سالہ ملزم نے مئی 2020سے جنوری 2025تک 261افراد کو نشانہ بنایا، ملزم کو عمر قید کی سزا سنا دی گئی۔ ساؤتھ کوریا کی عدالت نے ملک کی تاریخ کے سب سے بڑے آن لائن جنسی استحصال کے کیس میں ملوث کم نوک وان کو عمر قید کی سزا سنادی۔عالمی خبر رساں ادارے کے مطابق کم نوک وان نے خود کو پادری کہتے ہوئے ایک پیرامیڈ اسٹائل کا نیٹ ورک بنایا اور لوگوں کو ڈرا دھمکا کر عریاں، ناجائز اور غیرقانونی مواد تیار کرانے پر مجبور کرتا تھا۔

33سالہ کم نوک وان ایک منظم جنسی جرائم کے گروہ “ویجلنٹیز”کا سرغنہ تھا۔ اس کام کے لیے سماجی رابطے کی ویب سائٹ ٹیلیگرام کو استعمال کیا اور صارفین کو اپنے شکنجے میں جکڑا۔ وہ ٹیلی گرام پر ایسے مرد تلاش کرتا جو ڈیپ فیک یا غیرقانونی تصاویر بنانے میں دلچسپی رکھتے اور ایسی خواتین سے رابطہ کرتا جو جنسی تجسس کا اظہار کرتی تھیں۔بعد ازاں وہ انھیں ذاتی معلومات افشا کرنے یا پولیس کو رپورٹ کرنے کی دھمکیاں دے کر بلیک میل کرتا تھا۔اس نے مئی 2020سے جنوری 2025تک 261افراد کو نشانہ بنایا۔ یہ جنوبی کوریا میں سائبر جنسی استحصال کے متاثرین کی سب سے بڑی تعداد ہے۔