اڑتی ٹیکسی کا خواب پورا ہو گیا، دبئی میں پہلی آزامائشی پرواز کامیاب ہو گئی

حال نیوز۔۔۔۔۔۔اڑتی ٹیکسی کا خواب پورا ہو گیا، دبئی میں پہلی آزامائشی پرواز کامیاب ہو گئی، اسکائی پورٹس کمپنی دبئی انٹرنیشنل ایئرپورٹ کے قریب پہلا ائیر ٹیکسی اسٹیشن قائم کر رہی ہے۔ متحدہ عرب امارات نے جدید ٹیکنالوجی کی دنیا میں ایک اور سنگ میل عبور کر لیا، دبئی میں اڑنے والی ٹیکسی کی پہلی آزمائشی پرواز کامیابی سے مکمل کرلی گئی۔

متحدہ عرب امارات کے حکام کے مطابق یہ آزمائشی پرواز دبئی اور العین کے درمیان مرغم کے صحرائی علاقے سے شروع ہوئی اور المکتوم ایئرپورٹ پر کامیابی سے اختتام پذیر ہوئی۔حکام کا کہنا تھاکہ یہ الیکٹرک ائیر ٹیکسی 320کلومیٹر فی گھنٹہ کی رفتار سے پرواز کر سکتی ہے، جس میں 4مسافروں کے بیٹھنے کی گنجائش ہے۔

حکام کے مطابق یہ مکمل طور پر ماحول دوست ہے اور عام فضائی گاڑیوں کے مقابلے میں شور بھی نہ ہونے کے برابر پیدا کرتی ہے۔اماراتی حکومت نے اعلان کیا ہے کہ 2026میں ائیر ٹیکسی سروس عوام کیلئے باقاعدہ طور پر شروع کی جائیگی، جبکہ شہری علاقوں میں مزید تجرباتی پروازوں کا شیڈول بھی تیار کیا جا رہا ہے۔اسکائی پورٹس کمپنی دبئی انٹرنیشنل ایئرپورٹ کے قریب پہلا ائیر ٹیکسی اسٹیشن قائم کر رہی ہے۔