پشاور، 5 اگست 2025 – پریس انفارمیشن ڈیپارٹمنٹ (پی آئی ڈی) پشاور کے زیرِ اہتمام آج یومِ استحصال عقیدت و احترام کے ساتھ منایا گیا، جس کی صدارت ڈپٹی ڈائریکٹر محمد حنیف نے کی۔ اس موقع پر دفتر کے افسران و عملے اور دیگر مقامی افراد نے کشمیری عوام سے یکجہتی اور بھارتی غیر قانونی قبضے کے خلاف آواز بلند کرنے کے عزم کا اعادہ کیا۔
اس دن کی مناسبت سے منعقدہ تقریب میں اس تاریخی سانحے کو اجاگر کیا گیا جس کے تحت بھارت نے 5 اگست 2019 کو یکطرفہ طور پر آرٹیکل 370 کا خاتمہ کر کے کشمیریوں کو ان کی آئینی، جغرافیائی اور انسانی شناخت سے محروم کر دیا۔ تقریب میں شرکاء نے بازوؤں پر سیاہ پٹیاں باندھ کر اور ایک منٹ کی خاموشی اختیار کر کے کشمیری شہداء کو خراجِ عقیدت پیش کیا۔
ڈپٹی ڈائریکٹر محمد حنیف نے اپنے خطاب میں کہا کہ “یومِ استحصال صرف ایک رسمی دن نہیں، بلکہ ضمیر کو جھنجھوڑنے اور سچ کو اجاگر کرنے کا دن ہے۔ ہم کشمیری بھائیوں کی جدوجہد کو صرف یاد ہی نہیں کرتے، بلکہ اس کا مقدمہ دنیا کے ہر فورم پر پیش کرنے کے پابند بھی ہیں۔”
انہوں نے کہا کہ کشمیری عوام کی آواز کو دبانے کی ہر کوشش رائیگاں جائے گی، کیونکہ ظلم کی عمر لمبی نہیں ہوتی۔ انہوں نے اس بات پر زور دیا کہ میڈیا اور سرکاری اداروں کی ذمہ داری ہے کہ وہ کشمیر سے متعلق درست معلومات کو دنیا تک پہنچائیں اور جھوٹے بیانیوں کا مؤثر جواب دیں۔
تقریب میں دستاویزی ویڈیوز دکھائی گئیں، قومی قیادت کے یکجہتی کے پیغامات پڑھے گئے، اور آخر میں کشمیری عوام کے لیے خصوصی دعا بھی کی گئی۔
پی آئی ڈی پشاور کی اس کاوش کا مقصد نہ صرف کشمیر کے مظلوم عوام کے ساتھ اظہارِ یکجہتی تھا بلکہ اس عزم کا اعادہ بھی کہ پاکستان کشمیری عوام کی جدوجہد میں ان کے شانہ بشانہ کھڑا ہے — ہر فورم پر، ہر سطح پر۔
Comments are closed.